Drama actress, muntik makulong sa ibang bansa!

Muntik na palang hindi pasakayin ng eroplano pabalik ng Pilipinas ang isang drama actress dahil nakipagtalo ito sa security ng isang international airport. Masyado kasing strict sa naturang airport ng bansang pinagbakasyon ng drama actress kasama ang kanyang mga kaibigan. Allowed nga lang ang isang carry-all bag or hand-carry bag na may specific na sukat. Other than one bag ay hindi na puwede at babayaran mo na kung may additional ka pang dala-dala sa loob ng eroplano.


Sinabihan na si drama actress ng kanyang mga kaibigan na isang bag lang ang dalhin niya bilang hand-carry niya. Pero pinagpilitan ng drama actress na bukod sa hand-carry ay may isa pang bag na dala. Bagong bili niya kasi ang signature bag at gusto niyang i-display ito sa airport.


Pagdating nila sa security papunta na sa kanilang pag-board ng eroplano, pinigilan ang drama actress ng security at sinabing hindi puwedeng dalawa ang hand-carry niya. Isa lang ang allowed.


Nakipagtalo pa ang drama actress dahil hindi nga raw puwede na isa lang ang dala niya dahil hindi kasya roon sa hand-carry niya ang mga importanteng mga dala niya tulad ng passport, cell phone at kung anu-ano pa.


Sinabihan siya na ilipat na lang ang laman ng dala-dala niyang bag sa kanyang hand-carry dahil iyon daw ang policy ng kanilang airport. ‘Yung dala niyang isang bag ay ipasok na rin sa hand-carry.


Lalong nalokah ang drama actress dahil dinayo pa niya ang mamahaling bag na iyon sa bansang iyon tapos ay ipapatupi lang ito sa kanya para maisaksak sa kanyang hand-carry. Kaya nakipagtalo ulit ito sa security. Dahil sa gulo ay nilapitan na ang drama actress ng iba pang security at dinala siya sa isang opisina. Nagsisimula raw siya ng gulo at baka ikulong pa siya sa airport dahil nakikipagtalo ito sa airport security.


Nahimasmasan nga ang drama actress dahil ayaw nga niyang makulong sa airport at kailangan na niyang makabalik sa Pilipinas dahil may trabaho siyang sisimulan. Nakakahiya raw na mabalitang nakulong siya sa ibang bansa dahil lang sa isang bag na dala niya.


Nakiusap na lang siya kung ano ang dapat gawin. Definitely ay ayaw niyang tupiin ang mamahalin niyang bag. Pagkatapos ng ilang pag-uusap sa security, napagkasunduan na magbabayad na lang ng excess luggage ang drama actress. ‘Yun na lang daw ang puwedeng gawin kung gusto niyang bitbitin ang dalawang bag sa loob ng eroplano.


Wala nang ginawang debate ang drama actress dahil ayaw niyang maiwanan siya ng eroplano. Kahit na kilalang kuripot ito, nagbayad na lang siya kahit na mahal, huwag lang masira ang mamahalin niyang bag.

Abante
SATURDAY, NOVEMBER 27, 2010