Male celeb, unti-unting lumalabas ang sungay!

May attitude problem na raw ang male celebrity na ito na dati-rati ay mabait at sunod lang nang sunod sa kanyang manager. Ngayon daw ay nakikita na nilang unti-unti nang lumalabas ang sungay nito.


Very professional nga raw ang male celebrity na ito noong nagsisimula pa lang sa showbiz. Kapag ang calltime niya ay alas-12:00 ng tanghali, alas-10:00 pa lang daw ay nasa venue na siya. Katwiran niya kung bakit siya maaga ay dahil ayaw niyang may naghihintay sa kanya. Mabuti na raw ‘yung siya ang maghintay kesa siya ang hintayin.


Kaya naman marami ang natutuwang reporters sa kanya dahil mabilis siyang ma-interview at napaka-honest sumagot. In short, hindi showbiz.


Pero habang tumatagal nga raw sa showbiz ang male celebrity at papasikat ito, unti-unti nilang napapansin ang hindi magandang nangyayari sa personalidad nito.


Tulad noong mag-show ito ng ilang weeks sa ibang bansa, napansin nila na naging palautos ito sa kanyang personal assistant. Ultimo pagbitbit ng bagahe ay inuutos pa. Hindi tulad noong first time nilang mag-abroad ay nahihiya itong mag-utos dahil kaya naman daw niyang magbitbit ng mga gamit niya.


Napansin din na nagiging materyoso na ang male celebrity. Bihira na itong makihalubilo sa kanyang mga fans. Mas gusto raw niya ang mga fans niya abroad dahil mamahalin daw ang mga regalo nila sa kanya.


Ngayon nga raw ay nagiging unprofessional na ang male celebrity. Ilang beses na raw itong nale-late sa mga events na dapat nandoon siya ng maaga. Katwiran niya ay hindi raw siya nagising kaagad at natrapik siya. Minsan naman daw ay naligaw daw ang driver niya or nasiraan sila sa kung saan. Iba-iba ang excuses ng male celebrity kaya naririndi na ang kanyang manager sa kabi-kabilang sumbong sa kanya ng staff ng opisina nila.


May ilang events din daw na hindi pinupuntahan ni male celebrity. Katwiran nito ay may sakit siya o kailangan may samahan siyang family member sa isang family affair. Nalaman na lang ng manager na may kinahuhumalingang sexy actress ang male celebrity. Nami-miss nito ang mga dapat na pagkakitaan niya nang dahil lang sa isang babae.


Nagbigay na nga na warning ang manager na ito sa kanyang alaga na kapag hindi ito nagbago ng pag-uugali ay hindi siya manghihinayang na bitawan ito kahit na malakas itong kumita. Kesa naman daw na mamrublema siya sa ugali nito, mabuti na raw ‘yung bitawan niya ito para hindi siya ma-stress at hindi siya masisi ng mga taong kumuha sa serbisyo ng male celebrity na nagiging unprofessional na ngayon.

RUEL MENDOZA
WEDNESDAY, NOVEMBER 24, 2010