MALE SINGER MUKHANG PERA (Nakangingiti pa kaya siya ngayon?)

NAWASAK na nang tuluyan ang imahe ng isang male singer na produkto ng isang reality show nang dahil din sa kanyang kagagawan. Walang ibang dapat sisihin sa pagtamlay ng kanyang career kundi siya rin mismo dahil maagang nalunod sa kalahating basong tubig lang ang singer na ito.

Napakasimple niyang tingnan sa malayuan, para ngang hindi siya marunong magsalita ng anumang laban sa kanyang kapwa, pero nalantad din ang tunay niyang ugali nu’ng bandang huli.

Kuwento ng aming source, “Nu’ng minsan, tumawag ang isang reporter na nakatulong sa kanya nang matindi nu’ng nagsisimula pa lang siya. Kinukuha siyang mag-grace sa fiesta, maayos naman ang budget nu’ng nag-iimbitang reporter, hindi nga lang ganu’n mismo sa singil niya kapag out of town ang ginagawa niyang show.

“Pumayag naman ang manager sa talent fee ng reporter, kung napagbibigyan nga naman nila ang ibang tao, bakit hindi ang reporter na napakalaki ng naitulong sa career ng alaga niya?

“So, okey na, kasado na ang pagpunta niya sa fiesta. Heto na, a day before the fiesta, tumawag ang manager sa reporter, pasensiya na raw, dahil nagkaroon ng problema sa schedule ng alaga niya.

“Bigla raw pumasok ang isang appointment na matagal na nilang nasagutan. Nagtaka ang reporter, biglaan lang ang appointment, pero matagal na pala nilang natanguan ‘yun? Nasaan nga naman ang consistency?

“Walang nagawa ang reporter kundi ang humanap na lang ng ipampapalit sa male singer, mabuti naman at nakakuha siya agad, pero minarkahan na niya ang male singer na ‘yun,” kuwento ng aming source.

Heto na. Nalaman na lang ng reporter na nu’ng mismong gabi palang dapat ay nasa probinsiya nila ang male singer ay nasa isang probinsiya siya. Malaki ang TF du’n, kaya buking na buking ang singer at ang kanyang manager na pera-pera lang pala ang naging labanan, inilaglag nila ang show ng reporter dahil mas maliit ang budget nito para sa kanya.

Isang impormante ang nagbulong sa reporter, “Walang kasalanan ang manager sa nangyari, ‘yung singer ang utak ng lahat ng ‘yan. Mukhang pera talaga siya, wala siyang utang na loob, inaway-away niya ang manager niya nu’ng ipinipilit ang show mo sa alaga niya.”

Ngayon ay malamlam na ang career ng male singer, wala na siyang regular show, wala rin siyang concert o kahit anong project. Karma lang ang tawag du’n dahil sa kawalan niya ng utang na loob at pagpapahalaga sa mga taong may malaking naitulong sa career niya.

Ang initials ng mayabang na singer na ito ay kapareho ng brand ng isang imported na clothing line. Nakangingiti pa kaya siya ngayon?


HULAAN NA!